Колумна на Слободан ТОМИЌ – “Парадигмата на спасот: проф. д-р Сашко Јовев и проф. д-р Огнен Костовски , пример за здравство што лечи, не што уништува”

Македонија

Пишува: Слободан ТОМИЌ

Слободан ТОМИЌ

Во време кога македонското здравство се соочува со тешки предизвици, кога пациентите бараат сигурност и резултат, постојат ликови што светат како огнови во темнината.

Тоа се проф. д-р Сашко Јовев и проф. д-р Огнен Костовски , не како исклучоци, туку како парадигма што треба да стане правило.

Проф. д-р Сашко Јовев – архитектот на животот

Сашко Јовев не е човек кој бара слава. Тој ја изгради државната кардиохирургија од темел, ја унапреди и ја претвори во национален центар за живот.

Изведе првата трансплантација на срце, воведе најсовремени оперативни процедури и, уште поважно, воспостави ред, дисциплина и јасен приоритет: пациентот е светост.

Неговото управување се темелеше на знаење, посветеност и човечност.
Токму затоа, јавноста со право бара негово враќање таму каде што му е местото.

Проф. д-р Огнен Костовски – хирургот што не чека наредба за да спаси

Професорот Костовски не се промовира, не глуми „реформатор“ , тој оперира, спасува и води тимови со стручност и посветеност.

Во тешките моменти, како по трагичните настани во Кочани, тој ја презеде одговорноста како координатор, оперативец и организатор.

Под негово водство, повредените беа стабилизирани, третирани и транспортирани во најдобрите странски клиники.

Тој е авторитет во Клиниката „Мајка Тереза“ ,не по сила, туку по знаење, ред и резултати.

Тоа е модел што инспирира и води.

Не бараме афирмација – туку враќање на достоинството

Не им треба „медиумска афирмација“ како сензација.

Тие се докажани врвни професионалци, визионери и луѓе со потпишан авторитет пред народот и професијата.

Нивниот труд треба да биде препознаен, поддржан и институционално вреднуван.
Здравството мора да се преструктуира околу вакви ликови , околу знаење, организација и човечност.

Време е за итна, длабока и системска реформа

Македонскиот народ целиот живот плаќа здравствено и социјално осигурување.

Тој народ заслужува не само лекување, туку достоинствено, современо, достапно и човечно здравство.

Затоа, паралелно со поддршката на квалитетните кадри, неопходно е:

  • Итно да се обезбедат услови за високи плати за целиот здравствен персонал – од техничарите, преку медицинските сестри, до професорите и хирурзите.
  • Да се изгради нов, современ Клинички центар во Скопје, но и модерни болници во сите поголеми градови.
  • Да се инвестира во опрема, инфраструктура и едукација.
  • Здравството мора да биде столб на националната безбедност и иднина. Тоа е темелното право на секој човек – без разлика дали има или нема.

И токму преку вакви визии и примери, Македонија може да изгради здравствен систем што лечи, што спасува, што дава надеж.

Акцент на иднината: со Мицкоски кон достоинствено здравство

Во овој критичен момент, премиерот Христијан Мицкоски има историска можност , и должност , да го врати здравството на вистинска основа.

Со современ, функционален и достоинствен Клинички центар што го заслужуваат Скопје и Македонија, со враќање на нашите најдобри кадри, со отворени врати за таленти и професионалци, тој може да го направи најсилниот пресврт за иднината на секој пациент.

Тоа не е само инфраструктура – тоа е здравјето на секој човек во оваа земја.

Апел до државата:

  • Враќање на проф. д-р Јовев таму каде што треба да биде – на чело на кардиохирургијата.
  • Институционална потврда на заслугите на проф. д-р Огнен Костовски, како лидер што не калкулира, туку спасува.
  • Здравствена реформа по моделот на знаење, организација и човечност.
  • Државата не смее да дозволи да се изгуби најдоброто што го има.

А најдоброто, веќе го знаеме по име и дело.

Само треба да им се врати местото што го заслужуваат.

Please follow and like us: