Мјанмарската армија фрли бомби врз будистички фестивал, најмалку 32 мртви

Свет

Најмалку 32 лица се убиени, а повеќе од 50 се повредени во северозападен Мјанмар по напад од страна на параглајдери на армијата, според мјанмарскиот медиум The Irrawaddy. Меѓу загинатите и повредените во нападот на местото на будистички фестивал има неколку деца.

Параглајдерите фрлија бомби во понеделник вечерта додека се одржуваше бдение со свеќи. „Колку што знам, 32 лица беа убиени, вклучувајќи пет членови на ненасилното движење и борците на отпорот што ја штитеа областа. Останатите се цивили“, изјави еден жител за The Irrawaddy. Експлозиите го отежнаа идентификувањето на жртвите.

Фестивал на светлината

Местото што беше нападнато е во регионот Сагаинг. Овој регион, кој беше погоден од голем земјотрес претходно оваа година, често е цел на војската бидејќи големи делови од него се контролирани од доброволни милиции формирани по пучот за борба против воениот режим во Мјанмар.

Овие групи, познати како Народни одбранбени сили (PDF), исто така ја формираат локалната самоуправа. Член на локалната PDF изјави за Би-Би-Си дека добиле информации за можен воздушен напад за време на прославата. Направен е обид да се растури собирот, но параглајдерите пристигнале побрзо од очекуваното. Самиот човек претрпел повреда на ногата.

Нема воена опрема

Луѓето се собрале за да го прослават фестивалот Тадинѓут, познат и како Фестивал на светлината. Тој го означува крајот на будистичкиот пост. Бдеењето со свеќи беше организирано како мирен протест против хунтата и претстојните национални избори. Имаше и повици за ослободување на политичките затвореници, вклучувајќи ја и Аунг Сан Су Ќи, демократски избраната лидерка која беше соборена и затворена за време на пучот на војската во Мјанмар во 2021 година.

Амнести Интернешнл изјави дека употребата на параглајдери на мотор од страна на хунтата за напади врз заедниците е дел од „загрижувачки тренд“. Локалните медиуми претходно објавија дека хунтата сè повеќе се одлучува за параглајдери поради недостиг на авиони и хеликоптери.

Меѓународните санкции во последните години ѝ го отежнаа на хунтата стекнувањето со воена опрема.

Please follow and like us: