Екс директор на затворот „Скопје“ Филип Андонов-Сокол оди во затвор.
Тој е прогласен за виновен во судскиот процес што против него и уште шестмина затворски полицајци се водеше за злоупотреба на службената положба и овластување.
За Сокол изречена е осумесечна ефективна затворска казна, а останатите обвинети во овој предмет поминаа со условни казни. Судот ги прогласи за виновни сите инволвирани за дела поврзани со злоупотреби и несовесно работење во затворската установа.
Од Кривичниот суд – соопштија дека при донесувањето на пресудата биле земени во предвид сите олеснителни и отежнувачки околности во однос на обвинетите.
Кривичен суд: „Обвинетиот Ф. А. (Филип Андонов – Сокол н.з.) за кривичното дело злоупотреба на службената положба и овластување од член 353 став 5 во врска со став 1 во врска со член 45 и член 22 од Кривичниот законик (КЗ), Судот го осуди на казна затвор во траење од осум месеци“, стои во соопштението од Основниот кривичен суд Скопје.
Филип Андонов Сокол е актуелен член на Извршниот одбор на опозицискиот СДСМ,
По објавената пресуда следуваа меѓусебни обвинувања на власта и опозицијата.
Од СДСМ ја обвинија актеулната власт дека преку „нарачани судски пресуди“ врши директна репресија врз партиски функционери од опозицијата.
СДСМ: „Ги поставија своите судии и обвинители и тргнаа. Нема повеќе независно судство, ниту независно обвинителство. Сè ставија во своите канџи“,наведоа од СДСМ во партиското соопштение.
Од владејачката ВМРО-ДПМНЕ експресно возвратија
ВМРО-ДПМНЕ: „Адонов беше ставен во Извршниот одбор на СДС бидејќи самите знаеја дека е виновен, па сега тоа го продаваат како политички прогон. СДС е како буквар, прочитани се од сите“,реагираа од ВМРО-ДПМНЕ.
Пресуда доаѓа по судскиот процес која започна во август година, а во кој се докажуваше одговорноста на раководството и вработените за пропустите во работењето на истражниот затвор

